O To’atūgā ua Fa’ava’atu’ia ai le Avea o Tama’ita’i ma Taitai o ’Āiga, Nuu ma Ekalesia i Sāmoa

E tusa ai ma faamaumauga o talatuu ma tala faafagogo, sa faaaloalogia taitaiga faatamaitai ao lei taunuu mai le Talalelei ma pulega faakolone i laufanua o Sāmoa. O se tasi o lagisoifua matamata tetele, o le pulega a le uluai Tafaifa o Salamasina i le silia ma le 40 tausaga. O le talitonuga, sa nofo filemu le atunuu, ma sologa lelei taualumaga uma o lenei pulega. Peitai, na amata ona soloia taitaiga faatamaitai ina ua faailo mai taitaiga a alii i le toai taunuu mai o Misionare i le 1830. Sa faamamalu e pulega faakolone, ma faaauau ai lava ona faaaloalogia i Sāmoa le ituaiga pulega lenei e oo mai i onapo nei. O le vaaiga lautele, ua sili ona toatele alii latou te umia tofiga fa’ata’ita’i i aiga, nuu ma ekalesia, nai lo tamaitai. Ua ’ausi gata tofiga fa’ata’ita’i e tamaitai oloo iai le naunau ma le agavaa, ona o nisi o toatuga ua fai ma papupuni. O le mafuaaga lena ua faaosofia ai lenei suesuega, seia vaili faafitauli ua ogotia ai avanoa tutusa o alii ma tamaitai i tulaga fa’ata’ita’i . O le aoina o manogi o le lolo mo le suesuega na faaaoga ai faatalanoaga, mataitu nisi o galuega fai i totonu o Komiti a Tina ma Tamaitai, ma iloilo faaiuga o suesuega sa faaautu i agavaa fa’ata’ita’i o tamaitai Sāmoa. Na faamautu mai i le suesuega manatu e faapea. O faafitauli ua vaemanua ai le avea o tamaitai ma taitai o aiga, nuu ma ekalesia, ona o tulafono a pulega a nuu e tapu ai le suafa matai o tamaitai, o le talitonuga e nafa le tamaitai ma tiute faaleaiga, ma le talitonuga faakerisiano, o le tama o le ulu o le aiga.